ËNDRRA TË MËDHA - roman  209 faqe

Romani zë fill në një ditë të kthjellët vere. Disa nga djemtë e Lagjes Brazil janë vënë përgjatë Virit, rrëkesë me ujë që zbret tatëpjetë ndanë rrugës dhe bëjnë valoma, prita prej balte në të cilat mblidhet uji, duke u përpjekur cili do ta bëjë valomën më të madhe. Njëri prej tyre rreket të bëjë me anë të një dinamoje biçiklete një hidrocentral të vogël tek përroi dhe më në fund ia arrin që nga llambushka të dalin disa rreze drite. Disa të tjerë janë ulur nën hijen e kumbullës dhe tregojnë përralla dhe anekdota. Të tjerë lozin te Lëmi i xha Palit.

Papritur qielli mbushet me zhurmë. Djemtë lënë lojërat dhe të habitur ndjekin me sy një aeroplan i cili fluturon mbi kokat e tyre deri sa zhduket në horizont. Ata rrinë me sytë drejt qiellit duke parë të mahnitur andej nga u zhduk aeroplani. Është aeroplani i parë që shohin në jetë.

Të mrekulluar nga ai aeroplan i argjendtë, dy prej personazheve i pushton dëshira që kur të rriten të bëhen aviatorë. Dhe për këtë ata duhet të përgatiten që tani. Aty për aty vendosin të ndërtojnë një aeroplan. Këtu fillojnë aventurat. Përmes skenave dhe episodeve humoristike, përmes provave pa sukses dhe shpesh edhe të dhimbshme, më në fund ata ndërtojnë një aeroplan prej një koshi triçikli të vjetër e të shkatërruar, mbetur nga lufta dhe arrijnë të fluturojnë me të disa metra duke kaluar nga njëra anë e përroit në tjetrën. Fluturimi zgjat vetëm dy sekonda dhe disa metra, por ai për dy djemtë do të thotë tepër shumë: ata e bënë të vërtetë ëndrrën e tyre për të fluturuar.