SI U BËRA ROBINSON - roman 221 faqe

Kundrejt katër vezëve, personazhi kryesor ble në shitoren e tregtarit Llukë një gjysmë libri të vjetër. Është romani “Robinson Kruzo”. Pa humbur kohë shkon në kaliven e tij të ndërtuar në fund të kopshtit dhe zhytet në lexim. Kaq shumë e mrekullojnë ngjarjet e atij gjysmë libri, saqë ai vendos ta imitojë Robinsonin në të gjitha veprimet e tij. Kaliven e tij e quan Kështjellë, siç e kish quajtur Robinsoni banesën e tij, kopshtin Ishull të Pabanuar, ndërsa proskën e ujit që kalon ngjitur me gardhin e kopshtit të tij, Oqean. Pas këtyre ai kujdeset që t’i ngjajë Robinsonit edhe në veshjen dhe pamjen e jashtme. Me shumë vështirësi shtje në dorë një bluzë të vjetër marinari me vija të bardha e të kaltra, sajon një kapele si të Robinsonit dhe të gjithë pajisjet që ai mban me vete: që nga tejqyra që Robinsoni mban varur në sup e deri tek çizmet e mëdha, megjithëse është verë dhe është pisku i vapës.

Heq të zitë e ullirit për të gjetur një lëkurë dhije me të cilën Robinsoni kish bërë ombrellën e tij dhe më në fund i ndrit fati: gjen në përrua një dhi të ngordhur të cilën e rrjep dhe ia mer lëkurën. Megjithëse dhija e ngrodhur lëshon erë të padurueshme, personazhi i romanit nuk ndalet, madje e quan veten me shumë fat që më së fundi do ketë edhe ai ombrellën e vet prej lëkure dhije, njëlloj si Robinsoni prej të cilës bën edhe një mjekër. Aventurat dhe ngjarjet komike vazhdojnë me ndërtimin e orës diellore, me rrethimin e Kështjellës me gardhe mbrojtëse e me frengji prej nga mund të qëllohej me pushkë në rast ardhjeje të piratëve në “Ishullin e Pabanuar”. Përveç këtyre, ai fillon të hedhë në “oqean” shishe me letra brenda ku bën thirrje për ndihmë. Ia mbush mendjen njërit prej shokëve të cilin e bën Premt. Me të ngjiten në tavanin e Shkollës së Vjetër dhe zënë një galicë (sorrë të porsalindur) të cilën ropaten ta mësojnë të flasë siç kish bërë Robinsoni me papagallin e tij dhe plot aventura të tjera të cilat mbarojnë në ditën e fundit të pushimeve verore, pas të cilës fillon viti i ri shkollor.